會令人失晒控嘅奶昔登陸台灣

電視台瘋狂報導，想唔失控都難! 令紐約市民喺寒風中排隊4個鐘嘅奶昔咁巴閉？咁凍仲要飲凍嘢？

台灣嘅一間表面睇落係酒吧嘅餐廳，近排就引入咗呢隻魔性非常高嘅奶昔，電視台爭相報導，究竟係紐約無嘢好飲定係真係咁正？我哋就試咗喇！

「失控奶昔」主要以外型誇張同繽紛做賣點，有少女最鍾意粉色系列嘅「繽紛樂園」，係以士多啤梨奶做底、杯邊仲圍住花花棉花糖，再配多舊用糖打起嗰種棉花糖，飲得奶昔就係鍾意咁！

另一款都好受歡迎嘅香蕉朱古力味奶昔 -「惡魔森林」，杯邊圍住一堆M&M，再配埋個個都好鍾意嘅Oreo﹑brownie同埋朱古力餅乾，令人又愛又恨嘅口味，呢次真係肥過肥妹！之但係飲落其實比想像中無咁甜，放心試。

另一款就係同「惡魔森林」好大對比嘅「白雪公主」以蘋果牛奶做底，外型好色彩繽紛，杯邊圍住彩色波波，喺cream上面撤滿彩針﹑爆谷同埋餅乾，飲落好有水果的清香，呢款奶昔比上面兩款較甜啲㗎！

佢哋仲岩岩新推出咗「珍珠美人魚」奶昔，負責人同我哋講呀，呢款每日只賣20杯嘅咋！你都快啲約埋班fd去試齊佢喇！

其實「失控奶昔」喺每日特定時段先會供應㗎！睇埋時間表先好去呀↓↓↓↓↓↓

2口串酒
地址：台北市大安區信義路四段378巷11號
營業時間：星期一﹑三至日 下午 12:00 至凌晨 03:00，逢星期二休息
「失控奶昔」供應時間：下午 2:00 至晚上 9:00